1900 കോടി രൂപയുടെ ഐപിഒയ്ക്ക് ഒരുങ്ങി ഡിജിറ്റൽ പേയ്മെന്റ് സ്ഥാപനം മോബിക്വിക്
1900 കോടി രൂപയുടെ ഐപിഒയ്ക്ക് ഒരുങ്ങി ഡിജിറ്റൽ പേയ്മെന്റ് സ്ഥാപനം മോബിക്വിക്. കമ്പനി ഇതിനായി സെബിക്ക് അപേക്ഷ സമർപ്പിച്ചു. 1,500 കോടി രൂപയുടെ പുതിയ ഓഹരികളും ഓഫർ ഫോർ സെയിലിലൂടെ 400 കോടി രൂപയുടെ ഓഹരികളും ഐപിഒ വഴി വിതരണം ചെയ്യും.
ജലവൈദ്യുത പദ്ധതി വികസിപ്പിക്കുന്നതിനായി നേപ്പാളുമായി കരാറിൽ ഏർപ്പെട്ട് എസ്ജെവിഎൻ
679 മെഗാവാട്ടിന്റെ ജലവൈദ്യുത പദ്ധതി വികസിപ്പിക്കുന്നതിനായി എസ്ജെവിഎൻ ഇൻവെസ്റ്റ്മെൻറ് ബോർഡ് ഓഫ് നേപ്പാളുമായി കരാർ ഒപ്പിട്ടു. 9700 കോടി രൂപയുടെ പദ്ധതിക്കാണ് കരാർ ആയത്. ഇന്ത്യ ഏറ്റെടുക്കുന്ന രണ്ടാമത്തെ വലിയ വിദേശ നിക്ഷേപ പദ്ധതിയാണിത്.
സ്റ്റീൽ സ്ട്രിപ്പ് വീൽസ് ക്യു 1 ഫലം, അറ്റാദായം 51.08 കോടി രൂപയായി
ജൂണിലെ ഒന്നാം പാദത്തിൽ സ്റ്റീൽ സ്ട്രിപ്പ് വീൽസിന്റെ അറ്റാദായം 51.08 കോടി രൂപയായി രേഖപ്പെടുത്തി. പോയവർഷം ഇതേകാലയളവിൽ കമ്പനിയുടെ അറ്റനഷ്ടം 38.09 കോടി രൂപയായിരുന്നു. കമ്പനിയുടെ പ്രവർത്തനങ്ങളിൽ നിന്നുള്ള പ്രതിവർഷ വരുമാനം 463.9 ശതമാനം വർദ്ധിച്ച് 678.13 കോടി രൂപയായി.
726 കോടി രൂപയുടെ ഓർഡർ സ്വന്തമാക്കി അശോക ബിൽഡ്കോൺ
എഞ്ചിനീയറിംഗ്, പ്രൊക്യുർമെന്റ്, കൺസ്ട്രക്ഷൻ പ്രോജക്ടിനായി നാഷണൽ ഹൈവേ അതോറിറ്റി ഓഫ് ഇന്ത്യയിൽ നിന്ന് അശോക ബിൽഡ്കോണിന് കത്ത് ലഭിച്ചു. 726 കോടി രൂപയുടെ പദ്ധതിയാണ് കമ്പനിക്ക് ലഭിച്ചത്.
100 ദശലക്ഷം ഡോളറിന്റെ ദീർഘകാല വായ്പയ്ക്കായി ബാങ്ക് ഓഫ് ബറോഡയുമായി കരാർ ഒപ്പുവച്ച് ഓല ഇലക്ട്രിക്
100 ദശലക്ഷം ഡോളറിന്റെ ദീർഘകാല വായ്പ സ്വരൂപിക്കുന്നതിനായി ബാങ്ക് ഓഫ് ബറോഡയുമായി കരാർ ഒപ്പുവച്ച് ഓല ഇലക്ട്രിക്. തമിഴ്നാട്ടിലെ ഹൊസൂരിലുള്ള ഇലക്ട്രിക് ഇരുചക്ര വാഹന ഫാക്ടറിയുടെ ഒന്നാം ഘട്ട ധനസഹായത്തിനായി ഈ തുക ഉപയോഗിക്കും. ഇലക്ട്രിക് ഇരുചക്ര വാഹനങ്ങൾക്കായി ആഗോള നിർമാണ കേന്ദ്രമായ ഓല ഫ്യൂച്ചർഫാക്ടറി സ്ഥാപിക്കുകയാണ് കമ്പനി. ഇതിനായി 2400 കോടി രൂപ നിക്ഷേപിക്കുമെന്നും കമ്പനി നേരത്തെ വ്യക്തമാക്കിയിരുന്നു.
ഉപഭോക്തൃ അനുഭവം മെച്ചപ്പെടുത്തുന്നതിനായി കൺവെർജുമായി കെെകോർത്ത് ടിസിഎസ്
ഉപഭോക്തൃ അനുഭവം മെച്ചപ്പെടുത്തുന്നതിനായി കൺവെർജ് ഐസിടി സൊല്യൂഷൻസുമായി കെെകോർത്ത് ടാറ്റാ കൺസൾട്ടൻസി സർവീസസ്. ഉത്പ്പന്ന നവീകരണം വേഗത്തിലാക്കാനും ഉപഭോക്തൃ ഇടപഴകൽ വ്യക്തിഗതമാക്കാനും ഈ പങ്കാളിത്തം സഹായിക്കും.
എച്ച് എഫ് സി എൽ ക്യു 1 ഫലം, അറ്റാദായം 316 ശതമാനം വർദ്ധിച്ച് 87 കോടി രൂപയായി
ജൂണിലെ ഒന്നാം പാദത്തിൽ എച്ച് എഫ് സി എൽ ലിമിറ്റഡിന്റെ പ്രതിവർഷ ഏകീകൃത അറ്റാദായം 316.4 ശതമാനം വർദ്ധിച്ച് 87.82 കോടി രൂപയായി. മുൻ പാദത്തെ അപേക്ഷിച്ച് അറ്റാദായം 3.73 ശതമാനമായി ഉയർന്നു. ഇതേകാലയളവിൽ കമ്പനിയുടെ പ്രവർത്തനങ്ങളിൽ നിന്നുള്ള വരുമാനം 72.47 ശതമാനം വർദ്ധിച്ച് 1206.87 കോടി രൂപയായി.
ഇന്ത്യയിൽ ഫവിപിരവിറിന്റെ ഓറൽ സസ്പെൻഷൻ മരുന്ന് അവതരിപ്പിച്ച് എഫ്.സി.ഡി ലിമിറ്റഡ്
കൊവിഡ് ചികിത്സയ്ക്കായി വായിലൂടെ ഉപയോഗിക്കുന്ന ഓറൽ സസ്പെൻഷൻ മരുന്ന് അവതരിപ്പിച്ച് എഫ്.സി.ഡി ലിമിറ്റഡ്. ഇന്ത്യയിലുടനീളമുള്ള എല്ലാ റീട്ടെയിൽ മെഡിക്കൽ ഷോപ്പുകളിലും മരുന്ന് ലഭ്യമാകും. ഇത് രോഗികൾക്ക് മികച്ച ഫലപ്രാപ്തിയും സൗകര്യവും വാഗ്ദാനം ചെയ്യുമെന്നും ഫാർമ കമ്പനി അവകാശപ്പെട്ടു.
