റിലയൻസ്, ഓല, രാജേഷ് എക്സ്പോർട്ട്സ് എന്നിവയെ ബാറ്ററി നിർമ്മാണത്തിനുള്ള പിഎൽഐ സ്കീമിന് കീഴിൽ തിരഞ്ഞെടുത്തു
ബാറ്ററി സ്റ്റോറേജ് നിർമ്മിക്കുന്നതിനുള്ള പിഎൽഐ സ്കീമിന് കീഴിൽ ഇൻസെന്റീവുകൾ ലഭിക്കുന്നതിനായി റിലയൻസ് ന്യൂ എനർജി സോളാർ, ഒല ഇലക്ട്രിക് മൊബിലിറ്റി, ഹ്യുണ്ടായ്, രാജേഷ് എക്സ്പോർട്ട്സ് എന്നിവയെ തിരഞ്ഞെടുത്ത് അഡ്വാൻസ്ഡ് കെമിസ്ട്രി സെൽ (എസിസി). ഉൽപ്പാദന ശേഷി 20 ഗിഗാവാട്ട് അവർ (GWh) ആക്കി വർധിപ്പിക്കാൻ ഹ്യുണ്ടായിക്കും ഒല ഇലക്ട്രിക്കിനും പിന്തുണ ലഭിച്ചിട്ടുണ്ട്. 5 GWh ഉൽപ്പാദന ശേഷി കൈവരിക്കുന്നതിന് റിലയൻസിനും രാജേഷ് എക്സ്പോർട്ട്സിനും പിഎൽഐ ലഭിക്കും.
സീൽ സോണി- ലയന കരാറിനെ പിന്തുണച്ച് ഇൻവെസ്കോ
സീ-സോണി ലയന കരാറിനെ പിന്തുണയ്ക്കുമെന്ന് അറിയിച്ച് സീ എന്റർടൈൻമെന്റ് എന്റർപ്രൈസസ് ലിമിറ്റഡിന്റെ (സീൽ) ഏറ്റവും വലിയ ഓഹരി ഉടമയായ ഇൻവെസ്കോ ഡെവലപ്പിംഗ് മാർക്കറ്റ്സ് ഫണ്ട്. സീലിന്റെ മാനേജിംഗ് ഡയറക്ടറും സിഇഒയുമായ പുനിത് ഗോയങ്കയെയും രണ്ട് സ്വതന്ത്ര ഡയറക്ടർമാരെയും നീക്കം ചെയ്യാനുള്ള അസാധാരണ പൊതുയോഗത്തിനായുള്ള (ഇജിഎം) ആവശ്യം തുടരേണ്ടതില്ലെന്നും കമ്പനി തീരുമാനിച്ചിട്ടുണ്ട്. സീൽ ഈ നീക്കത്തെ സ്വാഗതം ചെയ്യുകയും ചെയ്യുന്നു. എല്ലാ പങ്കാളികളിൽ നിന്നും വിലപ്പെട്ട പിന്തുണ തേടുന്നത് തുടരുമെന്നും സീൽ അറിയിച്ചു.
8,000 കോടിയുടെ ബോണ്ട് വായ്പാ പരിധി നിർദ്ദേശം പരിഗണിക്കാൻ ഐഡിബിഐ ബാങ്ക് ബോർഡ്
2022-23 സാമ്പത്തിക വർഷത്തിൽ ഏകദേശം 8,000 കോടി രൂപയുടെ ബോണ്ട് വായ്പാ പരിധി അംഗീകരിക്കുന്നതിനുള്ള നിർദ്ദേശം പരിഗണിക്കാൻ ഐഡിബിഐ ബാങ്കിന്റെ ബോർഡ്. ഇതുമായി ബന്ധപ്പെട്ടുള്ള ബോർഡ് മീറ്റിംഗ് മാർച്ച് 29ന് ചേരും. വിഭവങ്ങൾ ഒന്നോ അതിലധികമോ തവണകളായി കടമെടുക്കും. ലൈഫ് ഇൻഷുറൻസ് കോർപ്പറേഷന്റെ (എൽഐസി) ഉപസ്ഥാപനവും ഇന്ത്യൻ സ്വകാര്യ മേഖലയിലെ വായ്പ ബാങ്കുമാണ് ഐഡിബിഐ ബാങ്ക് ലിമിറ്റഡ്.
2022 ന്റെ പകുതിയോടെ ഇന്ത്യയുടെ ആഭ്യന്തര വ്യോമയാന മേഖല പൂർണമായി വീണ്ടെടുക്കുമെന്ന് എയർബസ്
യുക്രെയ്ൻ സംഘർഷത്തോടൊപ്പം വർദ്ധിച്ചുവരുന്ന എണ്ണവിലയും വ്യോമയാന വിപണിയെ ബാധിച്ചിരിക്കുകയാണ്. എങ്കിലും ഇന്ത്യയുടെ സിവിൽ ഏവിയേഷൻ മേഖല കോവിഡ് -19 പ്രതിസന്ധിയിൽ നിന്ന് വേഗത്തിൽ കരകയറാൻ സാധ്യതയുണ്ടെന്ന് എയർബസ് ഇന്ത്യ & സൗത്ത് ഏഷ്യ പ്രസിഡന്റ് റെമി മെയിലാർഡ് പറഞ്ഞു. നടപ്പു സാമ്പത്തിക വർഷത്തിന്റെ പകുതിയോടെ ഇന്ത്യയുടെ ആഭ്യന്തര ഗതാഗതം പൂർണമായി വീണ്ടെടുക്കുമെന്നും അടുത്ത വർഷത്തോടെ അന്താരാഷ്ട്ര ഗതാഗത മേഖല വീണ്ടെടുക്കുമെന്നും അദ്ദേഹം പ്രതീക്ഷിക്കുന്നുണ്ട്. അടുത്ത 20 വർഷത്തിനുള്ളിൽ ഇന്ത്യയ്ക്ക് 2,210 പുതിയ വിമാനങ്ങൾ ആവശ്യമായി വരുമെന്നാണ് എയർബസിന്റെ പ്രവചനം.
രാമഗുണ്ടം സോളാർ പദ്ധതിയുടെ 42.5 മെഗാവാട്ട് ശേഷി കമ്മീഷൻ ചെയ്ത് എൻടിപിസി
തെലങ്കാനയിലെ രാമഗുണ്ടം ഫ്ലോട്ടിംഗ് സോളാർ പദ്ധതിയിൽ 42.5 മെഗാവാട്ട് അധിക വൈദ്യുതി ഉൽപാദന ശേഷിയുടെ വാണിജ്യ പ്രവർത്തനങ്ങൾ ആരംഭിച്ച് എൻടിപിസി ലിമിറ്റഡ്. നേരത്തെ തന്നെ പദ്ധതിയുടെ 17.5 മെഗാവാട്ട് (പാർട്ട്-1), 20 മെഗാവാട്ട് (പാർട്ട്-2) എന്നിവ കമ്പനി കമ്മീഷൻ ചെയ്തിരുന്നു. രാമഗുണ്ടം പദ്ധതിയുടെ മൊത്തം വാണിജ്യാടിസ്ഥാനത്തിലുള്ള വൈദ്യുതി ഉൽപ്പാദനശേഷി ഇതോടെ 80 മെഗാവാട്ട് ആയിട്ടുണ്ട്. എൻടിപിസി ഗ്രൂപ്പിന്റെ സ്ഥാപിതവും വാണിജ്യപരവുമായ ശേഷി യഥാക്രമം 68,609.68 മെഗാവാട്ടും 67,949.68 മെഗാവാട്ടുമാണ്.
സാധാരണക്കാർക്ക് താങ്ങാനാവുന്ന ഭവന വായ്പകൾക്കായി എസ്ബിഐയുമായി സഹകരിച്ച് ഐഐഎഫ്എൽ ഹോം ഫിൻ
രാജ്യത്ത് ചെറിയ വീടുകൾ വാങ്ങുന്നവർക്കായുള്ള ഫലപ്രദവും താങ്ങാനാവുന്നതുമായ ഭവന വായ്പകൾ വർധിപ്പിക്കുന്നതിനായി സ്റ്റേറ്റ് ബാങ്ക് ഓഫ് ഇന്ത്യയുമായി (എസ്ബിഐ) സഹ-വായ്പാ പങ്കാളിത്തത്തിൽ ഏർപ്പെട്ട് ഐഐഎഫ്എൽ ഹോം ഫിൻ. ലോൺ സോഴ്സിംഗും സേവനവും കമ്പനി കൈകാര്യം ചെയ്യും. കരാറ് പ്രകാരം വായ്പയുടെ 80% എസ്ബിഐ നൽകും. ഐഐഎഫ്എൽ ഹോം ഫിൻ ഉപഭോക്താക്കൾക്ക് മുഴുവൻ ലോൺ സൈക്കിളിലും, സോഴ്സിംഗ്, ഡോക്യുമെന്റേഷൻ, വിതരണം, ശേഖരണം തുടങ്ങിയ സേവനങ്ങൾ നൽകും.
സാറ്റലൈറ്റ് ലോഞ്ചറുകൾ നിർമ്മിക്കാൻ താൽപ്പര്യമുള്ള സ്ഥാപനങ്ങളിൽ അദാനി എന്റർപ്രൈസസ്, എൽ ആൻഡ് ടി എന്നിവയും
ഉപഗ്രഹങ്ങളെ ഭ്രമണപഥത്തിലെത്തിക്കാൻ ഉപയോഗിക്കുന്ന ഐഎസ്ആർഒയുടെ റോക്കറ്റായ പോളാർ സാറ്റലൈറ്റ് ലോഞ്ച് വെഹിക്കിൾസ് (പിഎസ്എൽവി) നിർമ്മിക്കാൻ താൽപര്യം പ്രകടിപ്പിച്ച സർക്കാർ സ്ഥാപനങ്ങളുടെ നേതൃത്വത്തിലുള്ള രണ്ട് കൺസോർഷ്യയുടെ ഭാഗമായി അദാനി എന്റർപ്രൈസസ് ലിമിറ്റഡും ലാർസൻ ആൻഡ് ടൂബ്രോയും. ബഹിരാകാശ വകുപ്പിന് കീഴിലുള്ള ന്യൂ സ്പേസ് ഇന്ത്യ ലിമിറ്റഡ് അഞ്ച് പിഎസ്എൽവികൾ നിർമ്മിക്കാൻ കമ്പനികളിൽ നിന്ന് നിർദ്ദേശങ്ങൾ ക്ഷണിച്ചിരുന്നു. സർക്കാർ ഉടമസ്ഥതയിലുള്ള ഭാരത് ഹെവി ഇലക്ട്രിക്കൽ ലിമിറ്റഡും പിഎസ്എൽവി നിർമ്മിക്കുന്നതിനുള്ള സാങ്കേതിക-വാണിജ്യ നിർദ്ദേശം സമർപ്പിച്ചിട്ടുണ്ട്.
ബോയിങ്ങിൽ നിന്ന് ഓർഡർ നേടി മദർസൺ സുമി
വാണിജ്യ വിമാനത്തിന്റെ ഇന്റീരിയറുകൾക്കായി ആഫ്റ്റർ മാർക്കറ്റ് മോൾഡഡ് പോളിമർ ഭാഗങ്ങൾ നിർമ്മിക്കുന്നതിനും വിതരണം ചെയ്യുന്നതിനുമായി ബോയിങ്ങിൽ നിന്ന് ഓർഡർ നേടി മദർസൺ സുമി സിസ്റ്റംസ് ലിമിറ്റഡ് (എംഎസ്എസ്എൽ ). 2023 സാമ്പത്തിക വർഷത്തിന്റെ മൂന്നാം പാദം മുതൽ ഉൽപ്പാദനം ആരംഭിക്കും. നോയിഡയിൽ സ്ഥിതി ചെയ്യുന്ന എംഎസ്എസ്എൽ പ്ലാന്റിലായിരിക്കും ഇത് നിർമ്മിക്കുക. എയ്റോസ്പേസ് വ്യവസായത്തിന് സംയോജിത പരിഹാരങ്ങൾ നൽകുന്നതിനുള്ള കഴിവുകൾ വിപുലീകരിക്കുകയാണെന്ന് എംഎസ്എസ്എൽ അറിയിച്ചു.
10,000 കോടി രൂപ വരെ ദീർഘകാല വായ്പയെടുക്കാൻ എൽ ആൻഡ് ടി
10,000 കോടി രൂപ വരെ ദീർഘകാല വായ്പയെടുക്കാൻ അനുമതി നൽകി ഇൻഫ്രാസ്ട്രക്ചർ കമ്പനിയായ ലാർസൻ ആൻഡ് ടൂബ്രോയുടെ (എൽ ആൻഡ് ടി) ബോർഡ്. ദീർഘകാല വായ്പകളിൽ ബാഹ്യ വാണിജ്യ വായ്പകൾ, ടേം ലോണുകൾ അല്ലെങ്കിൽ നോൺ-കൺവേർട്ടിബിൾ ഡിബഞ്ചറുകൾ എന്നിവയിലൂടെ റീഫിനാൻസിങ് ഉൾപ്പെടുന്നുണ്ട്. അതേസമയം ബംഗ്ലാദേശിലുടനീളം എട്ട് സ്ഥലങ്ങളിൽ ഹൈടെക് ഐടി പാർക്കുകൾ നിർമ്മിക്കാനുള്ള സുപ്രധാന ഓർഡർ എൽ ആൻഡ് ടി നേടിയിട്ടുണ്ട്.
