അല്ലിസ് ഇന്ത്യയുടെയും ഗ്രീൻ ഇൻവെസ്റ്റ്മെന്റിന്റെയും
മുഴുവൻ ഓഹരികൾ ടെക് മഹീന്ദ്ര ഏറ്റെടുക്കുന്നു
അല്ലിസ് ഇന്ത്യയുടെയും ഗ്രീൻ ഇൻവെസ്റ്റ്മെന്റിന്റെയും 100% ഓഹരികൾ ഏറ്റെടുക്കുന്നതിനുള്ള നിർദ്ദേശത്തിന് ടെക് മഹീന്ദ്ര ലിമിറ്റഡ് അംഗീകാരം നൽകി. 125 മില്യൺ ഡോളറിനാണ് (929 കോടി രൂപ) ഏറ്റെടുക്കൽ. ചെലവ് കുറയ്ക്കാനും പ്രകടനം മെച്ചപ്പെടുത്താനും ഓർഗനൈസേഷനുകളെ സഹായിക്കുന്ന ടെക്നോളജി കൺസൾട്ടിംഗും നിയന്ത്രിത സേവനങ്ങളുമാണ് അല്ലിസ് വാഗ്ദാനം ചെയ്യുന്നത്.
ടെക്സ്റ്റൈൽസിന്റെ നിരക്ക് വർദ്ധന 5 ശതമാനത്തിൽ നിന്ന് 12 ശതമാനമായി ഉയർത്തുന്നത് മാറ്റിവച്ചു
ടെക്സ്റ്റൈൽസിന്റെ നിരക്ക് വർദ്ധന 5% ൽ നിന്ന് 12% ആയി മാറ്റാനുള്ള ജിഎസ്ടി കൗൺസിലിന്റെ തീരുമാനം മാറ്റിവച്ചു. തീരുമാനം 2022 ഫെബ്രുവരിയിലെ അടുത്ത മീറ്റിംഗിൽ വീണ്ടും അവലോകനം ചെയ്യും. വിവിധ സംസ്ഥാനങ്ങൾ നികുതി വർദ്ധനയെ എതിർത്തിരുന്നു. അസംഘടിത മേഖലയെയും സൂക്ഷ്മ, ചെറുകിട, ഇടത്തരം സംരംഭങ്ങളയും ഇത് ബാധിക്കുമെന്ന് ചൂണ്ടിക്കാട്ടിയായിരുന്നു ഇത്. നിരക്ക് വർദ്ധന പാവപ്പെട്ടവന്റെ വസ്ത്രം വിലപിടിപ്പുള്ളതാക്കുമെന്നും അവർ അവകാശപ്പെട്ടു.
ഇന്ത്യ ഇന്റർനാഷണൽ ക്ലിയറിംഗ് കോർപ്പറേഷന്റെ 10 ശതമാനം ഓഹരികൾ ഏറ്റെടുക്കാൻ എസ്ബിഐ
ഇന്ത്യ ഇന്റർനാഷണൽ ക്ലിയറിംഗ് കോർപ്പറേഷന്റെ (ഐഐസിസി) 10% ഓഹരികൾ ഏറ്റെടുക്കാൻ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ). 34.03 കോടി രൂപയുടെ നിക്ഷേപത്തിലൂടെ 9.95% ഓഹരിയാണ് എസ്ബിഐ ഏറ്റെടുക്കുക. ഗിഫ്റ്റ്-ഐഎഫ്എസ്സിയിൽ സ്ഥാപിതമായ ആദ്യ അന്താരാഷ്ട്ര ക്ലിയറിംഗ് കോർപ്പറേഷനാണ് ഐഐസിസി. ക്ലിയറിംഗും സെറ്റിൽമെന്റും റിസ്ക് മാനേജ്മെന്റ് സേവനങ്ങളും നൽകുന്ന സ്ഥാപനമാണിത്. ഇത് ഇൻഡെക്സ്, സിംഗിൾ സ്റ്റോക്ക് ഡെറിവേറ്റീവുകൾ, കറൻസി ഡെറിവേറ്റീവുകൾ, ഡെറ്റ് സെക്യൂരിറ്റികൾ എന്നിവ ക്ലിയർ ചെയ്യുകയും സെറ്റിൽ ചെയ്യുകയും ചെയ്യുന്നു.
പിമവൻസെറിൻ ക്യാപ്സ്യൂൾ വിപണനം ചെയ്യാൻ യുഎസ്എഫ്ഡിഎ അംഗീകാരം
സൈഡസ് ഫാർമസ്യൂട്ടിക്കൽസിന് യുഎസ്എഫ്ഡിഎയിൽ നിന്നും ജനറിക് പിമവൻസെറിൻ ക്യാപ്സ്യൂളുകൾ വിപണനം ചെയ്യുന്നതിനുള്ള താൽക്കാലിക അനുമതി ലഭിച്ചു. പാർക്കിൻസൺസ് സൈക്കോസിസ് എന്നിവയുമായി ബന്ധപ്പെട്ട ചികിത്സിക്കാണ് മരുന്നു ഉപയോഗിക്കുന്നത്. അഹമ്മദാബാദിലെ കാഡില ഹെൽത്ത്കെയറിന്റെ ഫോർമുലേഷൻ മാനുഫാക്ചറിംഗ് ഫെസിലിറ്റിയിലായിരിക്കും ഇത് നിർമ്മിക്കുക.
മഹാരാഷ്ട്രയിലെ എഫ്എംസിജി വിതരണക്കാർ ജനുവരി 1 മുതൽ എച്ച് യു എൽ ഉൽപ്പന്നങ്ങൾ ബഹിഷ്കരിക്കും
ഹിന്ദുസ്ഥാൻ യൂണിലിവർ ലിമിറ്റഡിന്റെ (എച്ച് യു എൽ) കിസാൻ ശ്രേണിയിലുള്ള ഉൽപ്പന്നങ്ങളുടെ വിതരണം ജനുവരി 1 മുതൽ നിർത്താൻ മഹാരാഷ്ട്ര കൺസ്യൂമർ പ പ്രൊഡക്ട്സ് ഡിസ്ട്രിബ്യൂഷൻ ഫെഡറേഷൻ. ബൾക്ക് ഡീലർമാരും സ്റ്റോക്കിസ്റ്റുകളും വൻകിട നിബന്ധനകൾ അടിസ്ഥാനമാക്കി എച്ച് യു എൽന്റെ ഉൽപ്പന്നങ്ങളുടെ വിതരണം നിർത്തുമെന്ന് മുന്നറിയിപ്പ് നൽകിയിട്ടുണ്ട്.
ദിലീപ് ബിൽഡ്കോണിന്റെ ഔദ്യോഗിക സ്ഥാപനങ്ങളിലും താമസസ്ഥലങ്ങളിലും സിബിഐ റെയ്ഡ്
ഭോപ്പാലിലെ ദിലീപ് ബിൽഡ്കോൺ ലിമിറ്റഡിന്റെ (ഡിബിഎൽ) ഉദ്യോഗസ്ഥരുടെ വീട്ടിലും റെസിഡൻഷ്യൽ പരിസരങ്ങളിലും റെയ്ഡ് നടത്തി സെൻട്രൽ ഇൻവെസ്റ്റിഗേഷൻ ബ്യൂറോ (സിബിഐ). നാഷണൽ ഹൈവേ അതോറിറ്റി ഓഫ് ഇന്ത്യയുടെ (എൻഎച്ച്എഐ) ഉദ്യോഗസ്ഥന് 20 ലക്ഷം രൂപ കൈക്കൂലി നൽകാൻ ശ്രമിക്കുന്നതിനിടെ മൂന്ന് ദിവസം മുമ്പ് കമ്പനിയുടെ എക്സിക്യൂട്ടീവ് ഡയറക്ടറെ സിബിഐ പിടികൂടിയതിനെ തുടർന്നാണ് നടപടി. എൻഎച്ച്എഐ ബാംഗ്ലൂരിലെ റീജിയണൽ ഓഫീസറും ഡിബിഎല്ലിന്റെ മൂന്ന് ഉദ്യോഗസ്ഥരും ഉൾപ്പെടെ അഞ്ച് പേരെ അറസ്റ്റ് ചെയ്തതായി മുതിർന്ന സിബിഐ ഉദ്യോഗസ്ഥൻ അറിയിച്ചു.
പ്രൊമോട്ടർ സ്ഥാപനങ്ങളുമായുള്ള ലയനത്തിന് അംഗീകാരം നൽകി ഐഡിഎഫ്സി ഫസ്റ്റ് ബാങ്ക് ബോർഡ്
ഐഡിഎഫ്സി, ഐഡിഎഫ്സി ഫിനാൻഷ്യൽ ഹോൾഡിംഗ് (പ്രൊമോട്ടർ ഗ്രൂപ്പ്) എന്നിവയുമായുള്ള ലയനത്തിന് അംഗീകാരം നൽകി ഐഡിഎഫ്സി ഫസ്റ്റ് ബാങ്കിന്റെ ഡയറക്ടർ ബോർഡ്. നിബന്ധനകൾക്ക് വിധേയമായി ലയന നടപടികൾ പൂർത്തീകരിക്കാൻ ബാങ്കിന്റെ ബോർഡ് കാപ്പിറ്റൽ റെയ്സ് & കോർപറേറ്റ് റികൺസ്ട്രിംഗ് കമ്മിറ്റിയെ രൂപീകരിക്കുകയും അധികാരപ്പെടുത്തുകയും ചെയ്തിട്ടുണ്ട്.
രണ്ട് സബ്സിഡിയറികളിലായി 1,000 കോടി രൂപ നിക്ഷേപിക്കാൻ പിബി ഫിൻടെക്
പോളിസിബസാർ ഇൻഷുറൻസ് ബ്രോക്കേഴ്സ് പ്രൈവറ്റ് ലിമിറ്റഡിൽ 700 കോടി രൂപ വരെ നിക്ഷേപം നടത്താൻ അനുമതി നൽകി പിബി ഫിൻടെക് ലിമിറ്റഡ്. അനുബന്ധ സ്ഥാപനമായ പൈസബസാർ മാർക്കറ്റിംഗ് ആൻഡ് കൺസൾട്ടിംഗ് പ്രൈവറ്റ് ലിമിറ്റഡിൽ 299.99 കോടി രൂപയുടെ നിക്ഷേപത്തിനും ഇത് അംഗീകാരം നൽകിയിട്ടുണ്ട്.
