കൊവിഡ് ബാധിത മേഖലകൾക്കായി 6.28 ലക്ഷം കോടി രൂപയുടെ ഉത്തേജക പാക്കേജ് പ്രഖ്യാപിച്ച് ധനമന്ത്രി
കൊവിഡ് പ്രതിസന്ധി മൂലം തകർന്ന മേഖലകളെ കെെപിടിച്ചുയർത്തുന്നതിനായി 6.28 ലക്ഷം കോടി രൂപയുടെ ഉത്തേജക പാക്കേജ് പ്രഖ്യാപിച്ച് ധനമന്ത്രി നിർമല സീതാരാമൻ. ഒരു വർഷത്തേക്ക് മെഡിക്കൽ ഇൻഫ്രാസ്ട്രക്ചർ വിപുലീകരിക്കുന്നതിനായി 23,220 കോടി രൂപ നീക്കിവയ്ക്കും. ഇതിനൊപ്പം 1.1 ലക്ഷം കോടി രൂപയുടെ വായ്പ ഗ്യാരണ്ടി പദ്ധതിയും മന്ത്രി പ്രഖ്യാപിച്ചു. ഈ പദ്ധതി പ്രകാരം 25 ലക്ഷത്തോളം ഗുണഭോക്താക്കൾക്ക് മൈക്രോ ഫിനാൻസ് സ്ഥാപനങ്ങൾ വഴി 1.25 ലക്ഷം രൂപ വരെ വായ്പയെടുക്കാൻ സാധിക്കും. ഒപ്പം എമർജൻസി ക്രെഡിറ്റ് ലൈൻ ഗ്യാരണ്ടി സ്കീം 3 ലക്ഷം കോടി രൂപയിൽ നിന്നും 4.5 ലക്ഷം കോടി രൂപയായി ഉയർത്തി.
എച്ച്.എ.എൽ ക്യു 4 ഫലം, അറ്റാദായം 31 ശതമാനം വർദ്ധിച്ച് 1622 കോടി രൂപയായി
മാർച്ചിലെ നാലാം പാദത്തിൽ ഹിന്ദുസ്ഥാൻ എയറോനോട്ടിക്സ് ലിമിറ്റഡിന്റെ പ്രതിവർഷ അറ്റാദായം 31.27 ശതമാനം വർദ്ധിച്ച് 1622.19 കോടി രൂപയായി. മുൻ പാദത്തെ അപേക്ഷിച്ച് അറ്റാദായം 90 ശതമാനമായി ഉയർന്നു. ഇതേകാലയളവിൽ കമ്പനിയുടെ പ്രതിവർഷ വരുമാനം 4.38 ശതമാനം വർദ്ധിച്ച് 10870 കോടി രൂപയായി. അതേസമയം ഓഹരി ഒന്നിന് 30 രൂപ വീതം കമ്പനി അവസാന ലാഭവിഹിതം പ്രഖ്യാപിച്ചു.
2025 ഓടെ 10 പുതിയ ഇലക്ട്രിക് വാഹനങ്ങൾ അവതരിപ്പിക്കാൻ ഒരുങ്ങി ടാറ്റാ മോട്ടോർസ്
2025 ഓടെ 10 പുതിയ ഇലക്ട്രിക് വാഹനങ്ങൾ അവതരിപ്പിക്കുമെന്ന് ടാറ്റാ മോട്ടോർസ്. ഇന്ത്യയിലും യൂറോപ്പിലുമായി ലിഥിയം സെൽ നിർമാണത്തിൽ നിക്ഷേപം നടത്താനുള്ള സാധ്യതകളും കമ്പനി പരിശോധിക്കുന്നു. ഇന്ത്യയിൽ ചാർജിംഗ് ഇൻഫ്രാസ്ട്രക്ചറിന്റെ വിപുലമായ ശൃംഖല സ്ഥാപിക്കുന്നതിന് ടാറ്റാ മോട്ടോർസ് അതിന്റെ വിഭവങ്ങൾ ഉപയോഗപ്പെടുത്തും.
നാൽക്കോ ക്യു 4 ഫലം, അറ്റാദായം 830 ശതമാനം വർദ്ധിച്ച് 935 കോടി രൂപയായി
മാർച്ചിലെ നാലാം പാദത്തിൽ നാഷണൽ അലുമിനിയം കമ്പനി ലിമിറ്റഡിന്റെ പ്രതിവർഷ അറ്റാദായം 830.99 ശതമാനം വർദ്ധിച്ച് 935 കോടി രൂപയായി. മുൻ പാദത്തെ അപേക്ഷിച്ച് അറ്റാദായം 290 ശതമാനമായി ഉയർന്നു. ഇതേകാലയളവിൽ കമ്പനിയുടെ പ്രതിവർഷ വരുമാനം 40.75 ശതമാനം വർദ്ധിച്ച് 2874.47 കോടി രൂപയായി.
കോൾ ഇന്ത്യയിൽ നിന്നും 9300 കോടി രൂപയുടെ ഓർഡർ സ്വന്തമാക്കി പവർ മെക്ക് പ്രോജക്ട്സ്
കോൾ ഇന്ത്യയുടെ അനുബന്ധ സ്ഥാപനമായ സെൻട്രൽ കോൾഫീൽഡ്സ് ലിമിറ്റഡിൽ നിന്നും 9294 കോടി രൂപയുടെ ഓർഡർ സ്വന്തമാക്കി പവർ മെക്ക് പ്രോജക്ട്സ്. പവർ മെക്ക് പ്രോജക്ടുകളുടെയും എഎംആർ ഇന്ത്യയുടെയും കൺസോർഷ്യത്തിനാണ് പദ്ധതി ലഭിച്ചത്. 1000 കോടി രൂപയിൽ താഴെയാണ് പവർ മെക്ക് പ്രോജക്ട്സിന്റെ വിപണി മൂലധനം.
യുഎസ് ആസ്ഥാനമായുള്ള ബ്രെയിൻ സ്കെയിൽ ഏറ്റെടുക്കാൻ ഒരുങ്ങി ടെക് മഹീന്ദ്ര
യുഎസ് ആസ്ഥാനമായുള്ള ബ്രെയിൻ സ്കെയിലിന്റെ മൊത്തം ഓഹരിയും ഏറ്റെടുക്കാൻ ഒരുങ്ങി ടെക് മഹീന്ദ്ര. 28.8 മില്യൺ ഡോളറിനാണ് ഏറ്റെടുക്കൽ നടക്കുക. ആഗസ്റ്റ് 15 ഓടെ ഏറ്റെടുക്കൽ പൂർത്തിയാകുമെന്നാണ് പ്രതീക്ഷിക്കുന്നത്.
ട്രഷറി പരിഹാരങ്ങൾക്കായി ടിസിഎസിനെ തിരഞ്ഞെടുത്ത് കൊമേഴ്സ്യൽ ബാങ്ക് ഓഫ് കുവൈത്ത്
അപകടസാധ്യതകൾ നിയന്ത്രിക്കുന്നതിനും അസറ്റ് ക്ലാസ് കവറേജ് വർദ്ധിപ്പിക്കുന്നതിനുമായി കൊമേഴ്സ്യൽ ബാങ്ക് ഓഫ് കുവൈത്ത് ടാറ്റാ കൺസൾട്ടൻസി സർവീസസിനെ തിരഞ്ഞെടുത്തു. വിപുലമായ അക്കൗണ്ടിംഗ്, റിപ്പോർട്ടിംഗ് എന്നിവ വാഗ്ദാനം ചെയ്യുന്നതിനും തത്സമയം പണവും സ്ഥാനങ്ങളും കൈകാര്യം ചെയ്യുന്നതിനും ബാങ്കിനെ ഇത് സഹായിക്കും.
എൻ.സി.എൽ ക്യു 4 ഫലം, അറ്റാദായം 52 ശതമാനം വർദ്ധിച്ച് 756 കോടി രൂപയായി
മാർച്ചിലെ നാലാം പാദത്തിൽ എൻ.സി.എല്ലിന്റെ പ്രതിവർഷ അറ്റാദായം 51.9 ശതമാനം വർദ്ധിച്ച് 756.83 കോടി രൂപയായി. ഇതേകാലയളവിൽ കമ്പനിയുടെ പ്രതിവർഷ വരുമാനം 7.4 ശതമാനം ഇടിഞ്ഞ് 2839.55 കോടി രൂപയായി. അതേസമയം ഓഹരി ഒന്നിന് 1.5 രൂപ വീതം കമ്പനി അവസാന ലാഭവിഹിതം പ്രഖ്യാപിച്ചു.
