ഒന്നാകാൻ ഒരുങ്ങി എച്ച്ഡിഎഫ്സി- എച്ച്ഡിഎഫ്സി ബാങ്ക്, ലയന വാർത്തയ്ക്ക് പിന്നാലെ കത്തിക്കയറി ഓഹരികൾ

ഇന്ന് എച്ച്.ഡി.എഫ്.സി ബാങ്കിന്റെ ഓഹരി വില 11 ശതമാനത്തിന്റെ മുന്നേറ്റം കാഴ്ചവച്ച് 1683 എന്ന നിലരേഖപ്പെടുത്തി. അതേസമയം തന്നെ എച്ച്.ഡി.എഫ്.സി ഓഹരി 14 ശതമാനം ഉയർന്ന് 2800 എന്ന നില കൈവരിച്ചു. എച്ച്.ഡി.എഫ്.സി ബാങ്കും എച്ച്ഡിഎഫ്സിയും ലയനം നടത്തി ഒന്നാക്കാൻ കമ്പനി ബോർഡ് അംഗീകാരം നൽകിയതിന് പിന്നാലെയാണ് ഓഹരികൾ ശക്തമായ മുന്നേറ്റം നടത്തിയത്.

• രണ്ട് രൂപ മുഖ വിലയുള്ള എച്ച്.ഡി.എഫ്.സി ലിമിറ്റഡിന്റെ 25 ഇക്വിറ്റി ഓഹരികൾ കൈവശമുള്ളവർക്ക് ഒരു രൂപ മുഖവിലയുള്ള എച്ച്.ഡി.എഫ്.സി ബാങ്കിന്റെ 42 ഓഹരികൾ ലഭിക്കും.
  

• ഇടപാടിന് ശേഷം എച്ച്.ഡി.എഫ്.സി ലിമിറ്റഡിന്റെ നിലവിലുള്ള ഓഹരി ഉടമകളുടെ കൈവശം  എച്ച്.ഡി.എഫ്.സി ബാങ്കിന്റെ 41 ശതമാനം ഓഹരികളുണ്ടാകും. എച്ച്.ഡി.എഫ്.സിയുടെ മൊത്തം എഎംയു എന്നത് 5.26 ലക്ഷം കോടി രൂപയും വിപണി മൂലധനം 4.44 ലക്ഷം കോടി രൂപയുമാണ്.
  
  
• എച്ച്‌ഡിഎഫ്‌സി ബാങ്ക് ഇപ്പോൾ ഉപഭോക്താക്കൾക്ക് മോർട്ട്‌ഗേജുകൾ ഒരു പ്രധാന ഉൽപ്പന്നമായി നൽകും. കമ്പനി പുതിയ ക്രെഡിറ്റ്, ഡെപ്പോസിറ്റ് ഉൽപ്പന്നങ്ങളും വാഗ്ദാനം ചെയ്യുന്നു. മുൻകൂറായി പണം നൽകാതെ തന്നെ ഒരു വീട് വാങ്ങുന്നതിനോ റീഫിനാൻസ് ചെയ്യുന്നതിനോ ഒരു വ്യക്തിയും ബാങ്കും തമ്മിൽ നടത്തുന്ന കരാറാണ് മോർട്ട്ഗേജ് എന്ന് പറയുന്നത്. ഒരു വ്യക്തി മോർട്ട്ഗേജിന്റെ നിബന്ധനകൾ പാലിക്കുന്നതിൽ പരാജയപ്പെട്ടാൽ, ആ വസ്തു തിരികെ പിടിക്കാനുള്ള നിയമപരമായ അവകാശം ഈ കരാർ നൽകിയ ബാങ്കിനൊ ധനകാര്യ സ്ഥാപനത്തിനൊ ഉണ്ട്. വരാനിരിക്കുന്ന പാദങ്ങളിൽ പലിശ നിരക്ക് ഉയരുമെന്ന് പ്രതീക്ഷിക്കുന്നതിനാൽ ഈ ലയനം എച്ച്.ഡി.എഫ്.സിക്കുള്ള ഫണ്ടിംഗ് ചെലവ് കുറയ്ക്കുന്നു.

എച്ച്‌ഡിഎഫ്‌സിയുടെ എക്‌സ്‌ചേഞ്ച് ഫയലിംഗ് അനുസരിച്ച്, നിർദ്ദിഷ്ട ലയനം വിവിധ പങ്കാളികൾക്ക് പ്രയോജനപ്പെടുത്താനും അർത്ഥവത്തായ മൂല്യം സൃഷ്ടിക്കാനും സഹായിക്കും. വർദ്ധിച്ച സ്കെയിൽ, സമഗ്രമായ ഉൽപ്പന്ന ഓഫർ തുടങ്ങി വിവിധ രീതിയിൽ ഇത് പ്രയോജനപ്പെടുമെന്ന് പ്രതീക്ഷിക്കുന്നു. ലയനം എച്ച്‌ഡിഎഫ്‌സി ബാങ്കിന്റെ സുരക്ഷിതമല്ലാത്ത വായ്പകളുടെ അനുപാതം കുറയ്ക്കാനും സഹായിക്കും. ഏപ്രിൽ 1 വരെയുള്ള എച്ച്‌ഡിഎഫ്‌സി, എച്ച്‌ഡിഎഫ്‌സി ബാങ്ക് എന്നിവയുടെ വിപണി മൂലധനത്തെ അടിസ്ഥാനമാക്കി, ലയന ശേഷം സ്ഥാപനത്തിന്റെ വിപണി മൂല്യം എന്നത് 12.8 ലക്ഷം കോടി രൂപയായിരിക്കാം.

2024 സാമ്പത്തിക വർഷത്തിന്റെ രണ്ടാം പാദത്തിലോ മൂന്നാം പാദത്തിലോ ലയനം പൂർത്തിയാകുമെന്ന് പ്രതീക്ഷിക്കുന്നു. സംയോജന പദ്ധതി നിലവിൽ റിസർവ് ബാങ്ക് ഓഫ് ഇന്ത്യ, സെക്യൂരിറ്റീസ് & എക്സ്ചേഞ്ച് ബോർഡ് ഓഫ് ഇന്ത്യ, മറ്റ് റെഗുലേറ്ററി അതോറിറ്റികൾ എന്നിവയുടെ അംഗീകാരത്തിന് വിധേയമാണ്.